രണ്ടാം വരവിൽ 8000 കോടി തിളക്കം; ലോകം ബിടിഎസ് തരംഗത്തിനൊപ്പം

ലോകമെമ്പാടുമുള്ള ദശലക്ഷക്കണക്കിന് ആരാധകരുടെ കാത്തിരിപ്പിന് വിരാമമിട്ട് കൊറിയൻ പോപ്പ് വിസ്മയം ബിടിഎസ് ആഗോള വേദിയിലേക്ക് തിരിച്ചെത്തുന്നു. സൈനിക സേവനത്തിനായി അംഗങ്ങൾ പിരിഞ്ഞുപോയതിന് ശേഷമുള്ള ഈ ഒന്നിക്കൽ സംഗീത ചരിത്രത്തിലെ ഏറ്റവും വലിയ സാമ്പത്തിക കുതിച്ചുചാട്ടമാകുമെന്നാണ് വിലയിരുത്തൽ. ഏകദേശം 8400 കോടി രൂപ വരുമാനമാണ് ഈ ഒത്തുചേരലിലൂടെ മാത്രം പ്രതീക്ഷിക്കുന്നത്.

ആഗോള വിപണി പിടിച്ചടക്കും

സംഗീത ലോകത്തെ എല്ലാ റെക്കോർഡുകളും തകർക്കുന്ന പ്രകടനമായിരിക്കും ബിടിഎസ് തിരിച്ചുവരവിൽ കാഴ്ചവെക്കുകയെന്ന് റിപ്പോർട്ടുകൾ സൂചിപ്പിക്കുന്നു. ലോകമെമ്പാടുമുള്ള പ്രമുഖ നഗരങ്ങളിൽ അരങ്ങേറുന്ന സംഗീത നിശകൾ വഴിയായിരിക്കും വരുമാനത്തിന്റെ വലിയൊരു ഭാഗം ലഭിക്കുക. ഇതിനകം തന്നെ ടിക്കറ്റുകൾക്കായി ആരാധകർ വലിയ തിരക്കാണ് കൂട്ടുന്നത്.

പുതിയ ഗാനങ്ങളും ആൽബങ്ങളും വിപണിയിലെത്തുന്നതോടെ ഡിജിറ്റൽ സ്ട്രീമിങ്ങിലും, ഫിസിക്കൽ വിൽപനയിലും പുതിയ റെക്കോർഡുകൾ പിറക്കും. ബിടിഎസ് ബ്രാൻഡിനോടുള്ള ആഗോള കമ്പനികളുടെ താൽപര്യം പരസ്യ വരുമാനത്തിലും വലിയ വർധനയുണ്ടാക്കും.

ബിടിഎസ് വികാരത്തെ മുതലെടുക്കാൻ നെറ്റ്ഫ്ലിക്സ്

ബിടിഎസ് ആരാധക കൂട്ടായ്മയായ 'ആർമി' വലിയ ആഘോഷങ്ങളോടെയാണ് തങ്ങളുടെ പ്രിയപ്പെട്ട താരങ്ങളെ വരവേൽക്കാൻ ഒരുങ്ങുന്നത്. സൈനിക സേവനം പൂർത്തിയാക്കി അംഗങ്ങൾ ഓരോരുത്തരായി തിരിച്ചെത്തുന്നത് സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരുന്നു. സംഗീതത്തിനപ്പുറം ഒരു വികാരം എന്ന നിലയിൽ ബിടിഎസ് സൃഷ്ടിക്കുന്ന സ്വാധീനം ആഗോള സമ്പദ്‌വ്യവസ്ഥയെപ്പോലും സ്വാധീനിക്കാൻ ശേഷിയുള്ളതാണ്. ബിടിഎസ് അംഗങ്ങളുടെ സൈനിക സേവന കാലഘട്ടം, അവരുടെ തിരിച്ചുവരവിനായുള്ള തയ്യാറെടുപ്പുകൾ, ഗ്രൂപ്പിന്റെ ഇതുവരെയുള്ള യാത്ര എന്നിവ ആസ്പദമാക്കി നെറ്റ്ഫ്ലിക്സ് പ്രത്യേക ഡോക്യുമെന്ററികൾ പുറത്തിറക്കാൻ സാധ്യതയുണ്ട്. ക്കും.

ബിടിഎസ് ആരാധകർ ലോകത്തിന്റെ എല്ലാ കോണുകളിലുമുണ്ട്. അവരുടെ പ്രിയപ്പെട്ട താരങ്ങളുടെ വിശേഷങ്ങൾ നെറ്റ്ഫ്ലിക്സിൽ മാത്രമാണ് ലഭ്യമാകുന്നതെങ്കിൽ, ലക്ഷക്കണക്കിന് പുതിയ ആളുകൾ നെറ്റ്ഫ്ലിക്സ് സബ്സ്ക്രിപ്ഷൻ എടുക്കാൻ തയ്യാറാകും. ഇത് കമ്പനിയുടെ വരുമാനത്തിൽ വൻ വർധനയുണ്ടാക്കും.

നിലവിൽ തന്നെ നെറ്റ്ഫ്ലിക്സ് കൊറിയൻ സിനിമകൾക്കും സീരീസുകൾക്കും വലിയ പ്രാധാന്യം നൽകുന്നുണ്ട്. ബിടിഎസ് അംഗങ്ങൾ അഭിനയിക്കുന്ന സീരീസുകളോ അല്ലെങ്കിൽ അവർ ഗാനങ്ങൾ പാടിയ സിനിമകളോ സ്ട്രീം ചെയ്യുന്നതിലൂടെ കൊറിയൻ സംസ്കാരത്തോടുള്ള ആരാധകരുടെ താൽപര്യം ബിസിനസ്സാക്കി മാറ്റാൻ നെറ്റ്ഫ്ലിക്സിന് സാധിക്കുന്നു. ബിടിഎസിന്റെ തിരിച്ചുവരവ് കൺസേർട്ടുകൾ അല്ലെങ്കിൽ പ്രത്യേക അഭിമുഖങ്ങൾ നെറ്റ്ഫ്ലിക്സ് വഴി തത്സമയം സംപ്രേഷണം ചെയ്യാനുള്ള ചർച്ചകൾ നടന്നേക്കാം. ഇത് ഡിസ്നി പ്ലസ് പോലെയുള്ള മറ്റ് പ്ലാറ്റ്‌ഫോമുകളുമായുള്ള മത്സരത്തിൽ നെറ്റ്ഫ്ലിക്സിന് മുൻതൂക്കം നൽകും.

Content Highlights: BTS comeback evolves into massive economic event across industries